شاعیر تانیتیمی
"پاشا موغانلی" تخللوصو ایله تانینان شاعیر محمد پاشاپور
-1368اینجی گونش ایلینین خزل آیینین 15اینجی گونونده، موغانین شاه تپه سی کندینده دونیایا گؤز آچدی.
- عائله نین اوچونجو اوشاغی اولارکن، سس سیز بیر اوشاقلیق عالمینده شعری سئوه سئوه بویا باشا چاتماغا آددیم آتیب و بیلیم یوردوندا تحصیل آلدی.
-گنج چاغیندان شعر یازماغا اوز گتیریب و 1391اینجی و 1395اینجی ایللرده آذربایجان فولکلورو اساسیندا اوشاقلار اوچون "جیرتدان" و "آخماق تولکو" آدلی ایکی منظوم ناغیل کیتابی ایشیق اوزو گؤردو.
.........................قارا قوتو..............................
قارا
وکیچیک بیر قوتو
پارچالاییب؛
داغیدیر
چئوره مده کی سوکوتو
سس لر_
تیخاجداکی ماشین لارین
سیقناللار مئلودییاسی کیمی
قاریشیق
قاریشیق...
سوز لر_
ایشیق لیق حوقوقو
دومانلار آرخاسیندا
دانیلمیش
ایشییق...
غفیل
سس دومانی ایچینده ن
سئیریلیر_
دیکتور قیزین
دوداقلاریندا دورولان کلمه لر_
سانکی؛
سئجاق صحرالیقدا
بیر بولاق
شففاف؛
شیرین؛
سرین سو
یوز بئش اف-ام
آذربایجان رادیوسوـ
دوغما درد
سئوینج
کدر
ایچیرم بو سویو
ایچیرم کونلومون
سوسوزلوق
احتیاجی قده ر.
قایناق: شام آغاجی http://vogar3.blogfa.com/
مصطفی ولی زاده
1992 میلاد ایلی سئنتیابیر آیینین 12 سی (21 شهریور) پارساباد شهرینده دوغوملودور
معمارلیق ساحه سینده عالی تحصیلی بیتیریب
حال حاضیردا پارساباد شهرینده یاشاییر
معمارلیق رشته سینده اکسپرت و پئشه کار بیر اینسان دیر
اوزل دیل اینسوتلاردا تورکچه (استانبولی) ، انگلیسجه ، روسجا دیلینده چالیشیر و اویرتمن دیر.
بو گئجه
بیتدی سئوگی حکایه سی
بو ساعات
سونا چاتماق زامانی دی
زامان پاشازاده
دوغوم
اؤکسوز شئعیرلریمین کفیل قایغی چکن لری!
سورارسانیزسا سؤزجوکلردن
آرارسانیزسا دیدرگین تینیمی آرالاریندان
اونوتمایین
آغری
آغری دئمکدیر؛
بارماق قویدوغونوز یئریمده
یوخسا بارماغینیزین اؤزونده اولسادا
هر بیر اولایدان یارانسادا
اولای یاراتسادا هردن.
دوغوم گونونوز قوتلو، شئعیرلریمین یئنی دوغولان آتالاری!
«اؤلوم له اولومون باش حرفینده» آغلایان
یاغیش لا یاغمورون سون هئجه سین ده ایسلانان
وارسا
سیزسینیز
یوخسا
منم (؟)
اؤکسوز شئعیرلریمین اؤکسوز سؤزجوکلری!
یوزولورسونوزسا سئویلدییینیز کیمی
چؤزولورسونوزسه سویولدوغونوز کیمی
پوزولورسونوزسا سؤیولدویونوز کیمی
هله کفن چوروتمه میش بیر اؤلو وار سیزی یاشاییر
یوزوم یئرینده باسدیریلمیش
چؤزوم یئرینده دویونله نمیش.
بویلو آنلاریمین دوغوم سانجی سی!
بئیین یاریم کوره سی
یوخسا کؤنول کوره سینده
یوغوروب
دوغوردونوز
ایچیمده کی «عوصیانچی سؤزجوکلری».
قایناق:http://uchluk.blogfa.com